Exhibition: Martino Lombezzi – N dé d’isté (Ladin)

foyer dl palaz provinzial 2 te plaza Silvio Magnago 10
Inauguraziun: 24.7.2017, 11:00
Mostra: 25.7. – 8.9.2017
Introduziun: Martino Lombezzi, Cinzia Venturoli, Sonia Zanotti
Cun le sostëgn de: Provinzia Autonoma de Bulsan Südtirol

 

N DÉ D’ISTÉ
Bologna, 2 de agost 1980
fotografies de Martino Lombezzi
a cura de Foto Forum
consulënza storica de Cinzia Venturoli
n proiet en colaboraziun con l’assoziaziun tra i familiars dles vitimes dl atentat ala staziun de Bologna ai 2 de agost
La sabeda, ai 2 de agost 1980 dales 10.25 él jü ciará n cufer che contignî na bomba de alt potenzial tl salf da aspeté de secunda tlas tla staziun zentrala de Bologna, plëna de porsones. La deflagraziun á fat tomé adöm i salfs da aspeté de pröma y secunda tlas y les strotöres dessura, olâ che al ê i ofizi dl’aziënda de restoraziun Cigar y zirca trënta metri de tët surastant. L’esplojiun á ince colpí la ferata Ancona-Basilea, chita sön la pröma scina. I vidri dles portines dles chertes y de düc i fabricac dlungia é jüs in frantöm.

Le bilanz tragich dl’esplojiun é sté de otantecin’ morc y duicënt feris.

Atira él gnü organisé i socursc y ciamó denant che al rovass adalerch les ambulanzes, i stödafüch y i soldas, é i suravic gnüs daidá da passanc, da dependënc dla ferata, fachins, mëmbri dles forzes dl ordinn y taxisć. Al se á spo metü adöm lunges morones umanes che passâ inant i calcinac y i cadrí porvan da delibré la zona dl’esplojiun tla speranza da ciafé porsones en vita, ince sce ferides, sot les rovines.

Tratan la nöt di 2 de agost él gnü rové ia i laûrs da romené sö les rovines: a düc i feris él gnü sport aiüt, i morc é gnüs condüc tles ciamenes di morc. Ai 6 de agost, le dé dles sopoltöres, é rovades milesc de porsones a Bologna da döta la Talia por desmostré solidarieté cun les vitimes y por protesté cuntra l’atentat, implîn Piazza Maggiore, les strades y les plazes incëria.

Al é gnü porvé deplü iadi da desvié les inrescides di magistrac. Tl 1995 la “Corte Suprema di Cassazione a Sezioni Unite Penali” á condané definitivamënter ala detenziun a vita por le massacher di 2 de agost 1980 i terorisc dl Nar (Nuclei armati rivoluzionari- formazione di estrema destra) Giuseppe Valerio Fioravanti y Francesca Mambro. Luigi Ciavardini, ince ël esponënt di Nar y al tëmp di fac de mëndra eté, é gnü condané tl 2007 a trënt’agn sciöche chël che á eseguì materialmënter l’ atentat. Por avëi invié ia aziuns da desvié les inrescides é gnüs condaná Francesco Pazienza, Licio Gelli, le general Pietro Musumeci y le colonel Giuseppe Belmonte, chisc ultimi ofiziai di sorvisc militars socrëc.

“Te chësta mostra vëgnel cunté la vita, nia la mort. An cunta chi che al ê, y chi che al é, les porsones colpides da chë bomba metüda tl salf da aspeté de öna dles staziuns talianes plü afolades. Cunté la vita di feris, la vita taiada ia de chi che ne á nia suravit, de chi che á pordü na porsona amada, nes lascia sintí empatia cun les vitimes, nes lascia reconësce te ëi, nes condüj daimpró n fat sozedü dadî y le fej sintí da sëgn. I ne sun nia plü foresc a chël massacher y i ún stromënc importanc por capí nosta storia.” Cinzia Venturosi